“Biz kadr potensialının hazırlanması işində daha da fəal olmalıyıq... Azərbaycan dünyanın sayı o qədər də çox olmayan kosmik klubuna da üzv olmuşdur. Bu, bizim siyasətimizi əks etdirir. Biz gələcəyə bu cür baxırıq: müasirlik, dinamik inkişaf, texnologiyaların tətbiqi. Bunlar olmasa biz istədiyimiz qədər inkişaf edə bilmərik. Biz isə istəyirik ki, inkişaf etmiş ölkələrin sırasına daxil olaq və imkanlar da var. Çünki kadr potensialı güclüdür. Təhsil lazımi səviyyədədir. Savadlılıq təxminən 100 faizdir. Bu, elmin inkişafı üçün əsas bazadır. Elmin inkişafına diqqət və qayğı göstərilir. Bütün bu amillər var. Əsas məsələ ondan ibarətdir ki, bütün bu strategiyamızı düzgün planlaşdıraq və addımlarımızı düzgün ataq ki, Azərbaycan bu sahədə də birincilər sırasında olsun.” Dövlətimizin başçısı İlham Əliyev XXI əsrin yeni texnologiyalar əsri olduğunu önə çəkərək, bildirir ki, o ölkələr bu texnologiyaların sahibidir, onlar dünya miqyasında öz maraqlarını daha yüksək səviyyədə müdafiə edə bilirlər.
Təkcə bu faktı qeyd etmək kifayətdir ki, Azərbaycanın yeni texnologiyaların inkişafına marağı təsdiqlənsin. Ölkəmiz son beş ildə orbitə 3 peyk çıxarıb: “Azərspace 1” telekommunikasiya peyki, “Azərsky” müşahidə peyki və “Azərspace 2”. Bu mühüm hadisələr dövlətimizin gücünü, həyata keçirilən siyasətin uğurlu gələcəyə hesablandığını təsdiqləyir. Ölkə Prezidenti İlham Əliyev üçüncü peykin orbitə buraxılması münasibətilə xalqa təbrikində bu məqamı da qeyd etmişdir ki, kadr hazırlığı üçün Azərbaycanın kosmik sənayesinin inkişafı önəmli rol oynayır. Peykləri idarə edən kadrlar azərbaycanlı mütəxəssislərdir və onların böyük əksəriyyəti gənclərdir.
Dövlətimizin başçısı İlham Əliyevin hər ili konkret bir sahənin adı ilə bağlayıb, bu istiqamətdə mühüm tədbirlər həyata keçirməsi də dövrün tələblərinə uyğun təkmilləşmə əsasında hərtərəfli inkişafa stimuldur. 2013-cü ilin ölkəmizdə “İKT İli”, 2014-cü ilin “Sənaye İli”, 2015-ci ilin “Kənd təsərrüfatı İli” və s. kimi mühüm addımlar günümüzün əsas çağırışları sırasında olan yeni texnologiyaların tətbiqi şəraitində iqtisadiyyatın rəqabət qabiliyyətliliyinin artırılmasında mühüm rol oynadı. Yeni inkişaf mərhələsinin əsas hədəfi çoxşaxəli, səmərəli və innovasiya yönümlü iqtisadiyyatın formalaşdırılması, sosial sahədə önləyici inkişaf trendinin təmin olunması, əhalinin rifahının layiqli, qabaqcıl beynəlxalq standartlara uyğun səviyyəyə çatdırılması, elmin, mədəniyyətin inkişafında, ictimai həyatın bütün istiqamətlərində yeni nailiyyətlərin əldə olunmasıdır. “Azərbaycan 2020: gələcəyə baxış” İnkişaf Konsepsiyası, eyni zamanda 12 istiqaməti özündə ehtiva edən Strateji yol xəritələri bu məqsədlərin gerçəkləşməsinə xidmət edir.
İqtisadiyyatın aynası olan dövlət büdcəsindən ayrılmalara diqqət yetirdikdə də müdafiə xərclərindən sonra təhsilin, elmin inkişafına önəm diqqətdən yayınmır. “Azərbaycanın dövlət büdcəsində təhsil xərcləri hərbi xərclərdən sonra ikinci yerdədir” söyləyərkən Prezident İlham Əliyev bu vəsaitlərin ildən-ilə artırılmasında ölkədə kadr hazırlığının beynəlxalq standartlara çatdırılmasını nəzərdə tutur. Dövlətimizin başçısı onu da qeyd edir ki, təhsilin səviyyəsi ölkəmizin perspektivlərini müəyyən edəcək. Qarşıya qoyulan məqsədə nail olmaq üçün ilk növbədə təhsilin bütün pillələrində maddi-texniki bazanın möhkəmləndirilməsinə, məktəblərin ən müasir İKT vasitələri ilə təminatına kadr hazırlığının təməli kimi diqqət yetirilir. Təhsil problemlərinin həlli istiqamətində zəruri addımların atılması, uşaqların gənc yaşlarından ən mütərəqqi təcrübə ilə tanış olması, beynəlxalq standartlara uyğun hazırlanması üçün ölkəmizdə əsaslı baza yaradılıb. Əsas vəzifə odur ki, təhsilə ayrılan xərclərdən səmərəli istifadə olunsun, gənc nəslin dünyada gedən proseslərə uyğun, eyni zamanda, milli dəyərlərə əsaslanaraq inkişafı təmin edilsin. Bakıda Gənclər Siyasəti üzrə Birinci Qlobal Forumun keçirilməsində də əsas məqsəd məhz bu idi ki, müxtəlif ölkələrdə aparılan gənclər siyasətinə diqqət artırılsın, gənclər siyasəti üzrə dünya ekspertləri bir araya gəlib, müasir dövrün cağırışlarını birgə cavablandırmağın yollarını müzakirə etsinlər. Dünya gənclərinin problemlərinin Azərbaycanda müzakirə olunması, gənclər siyasəti ilə bağlı ilk Qlobal Forumun ölkəmizdə keçirilməsi məhz bu sahədə də təcrübəmizin nümunəviliyinə, ölkənin hərtərəfli inkişafında gənclərin malik olduğu potensial imkanlardan səmərəli istifadəyə daha çox önəm verilməsinə işıq saldı. Müasir dövrün sosial-siyasi reallıqlarının, dünyanın yeni çağırışlarının intellektual gənclik qarşısında qoyduğu mühüm vəzifələr önə çəkilərək ötən ilin sonunda Gənc alimlərin I qurultayı keçirildi. İntellektual gəncliyin innovativ potensialının üzə çıxarılması, onların təhsil və məşğulluq məsələlərinə diqqətin artırılması, ölkəmizdə və xaricdə yaşayan gənc alimlərin fəaliyyətinin əlaqələndirilməsi istiqamətində işin gücləndirilməsi əsas hədəf kimi irəli sürüldü. Bütün bu addımlar ümumilikdə yenilikçi, müasir düşüncəyə malik olan gənclərin yeni texnologiyaların öyrənilməsinə və tətbiqinə marağının artırılması, ən əsası kadr hazırlığını iqtisadi inkişafın səviyyəsi ilə uyğunlaşdırmağa xidmət edir. Prezident kimi fəaliyyətə başladığı gündən “Neft kapitalını insan kapitalına çevirək” tezisini irəli sürən və bu istiqamətdə mühüm addımlar atan dövlətimizin başçısı İlham Əliyev hər zaman bildirir ki, yeniləşmə, təkmilləşmə dövlət siyasətinin əsasını təşkil edir. Cənab İlham Əliyev gələcəklə bağlı bunları açıqlayır: “İndi imkanlarımız genişlənir və elmin, elmi tərəqqinin inkişafına xüsusi diqqət göstərilməlidir, xüsusilə İKT sektorunda. Çünki İKT-nin inkişafı bir neçə məqsədi güdür. İlk növbədə bu, Azərbaycanın intellektual potensialının inkişafına xidmət göstərəcəkdir. Ölkədə gedən müasirləşmə siyasətinə dəstəyini verəcəkdir. Digər tərəfdən, bu sahədə çox böyük iqtisadi imkanlar vardır. Gələcəkdə İKT sektorunda yaranacaq gəlir Azərbaycan iqtisadiyyatının inkişafına çox böyük təsir göstərəcəkdir.” Məhz İKT sektorunda əldə olunan uğurlara söykənərək, bu fikri böyük əminliklə qeyd edirik ki, Azərbaycan bu gün dünyada təkcə neft-qaz ehtiyatlarına malik ölkə deyil, həmçinin yüksək səviyyəli elmi potensiala malik və informasiya-kommunikasiya texnologiyalarının tətbiq olunduğu innovasiyalar ölkəsi kimi tanınır. O da məlumdur ki, Beynəlxalq Telekommunikasiya İttifaqının qiymətləndirilməsinə əsasən Azərbaycan son illərdə İKT sahəsində dünya üzrə dinamik inkişaf edən ölkələr sırasında ilk onluqdadır.
Davamlı inkişafın təmin edilməsində məmur-vətəndaş münasibətlərinin rolunu nəzərə alsaq, bu gün ölkəmizdə beynəlxalq təcrübəyə əsaslanan “Elektron hökumət”in formalaşdırılması mütərəqqi addım kimi dəyərləndirilir. Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi bu sahədə görülən işlərin əlaqələndiricisi olaraq “Elektron Hökumət”in formalaşması üzrə digər dövlət orqanları ilə sıx fəaliyyət göstərir, müvafiq infrastrukturun yaradılması üzrə tədbirlər həyata keçirir. Azərbaycan brendi olan “ASAN xidmət” beynəlxalq səviyyədə dəstəklənir. Bu günlərdə dünyada bir çox məşhur simalarla görüşən, tanınmış televiziya kanallarında, xəbər proqramlarında və debatlarda iştirak edən robot “Sofiyanın “ ölkəmizə səfəri də Azərbaycanın innovasiyalar ölkəsi kimi qazandığı nüfuza bir daha aydınlıq gətirdi.
Bütövlükdə bəşəriyyətin innovasiyalardan, müasir texnologiyalardan faydalandığını qeyd edən ölkə Prezidenti İlham Əliyev bildirir ki, Azərbaycanın bütün sahələrdə təcrübəsi nümunə olmalıdır. “Azərbaycan 2020: gələcəyə baxış” İnkişaf Konsepsiyası, həmçinin davamlı inkişafa yönələn Strateji yol xəritələri 2013-2023-cü illərdən sonrakı dövrün də aydın mənzərəsini yaradır. Təhsilin, elmin və iqtisadiyyatın vəhdətliyinin qorunması fonunda Azərbaycanı inkişaf etmiş ölkələr sırasında görmək istəyimiz reallıqdır.
Yeganə Əliyeva, “İki sahil”