Mayın 6-da Qaradağ rayonu Lökbatan qəsəbəsində Ümummilli Lider Heydər Əliyevin anadan olmasının 101-ci ildönümü ilə əlaqədar Yeni Azərbaycan Partiyası Qaradağ rayon təşkilatı, Qaradağ rayon İcra Hakimiyyəti və Respublika Olimpiya Velosiped Məktəbinin birgə təşkilatçılığı Velosiped yarışı keçirilib.
Qaradağ rayonunda yerləşən bütün ümumtəhsil müəssisələrini əhatə edən yarışda 120-dək yuxarı sinif şagirdi iştirak edib.
Yarış iştirakçılarını salamlayan YAP Qaradağ rayon təşkilatının sədri Qafar Əliyev bildirib ki, müasir Azərbaycan dövlətinin qurucusu Ümummilli Lider Heydər Əliyevin anadan olmasının 101-ci ildönümü hazırda ölkəmizin hər yerində, o cümlədən Bakının Qaradağ rayonunda geniş qeyd edilir. Bu gün keçirilən Velosiped yarışının əsas məqsədi Ulu Öndər Heydər Əliyevin irsini geniş təbliğ etmək, şagirdlərə vətənpərvərlik hissləri aşılamaq, onları dövlətçilik və milli-mənəvi dəyərlərə hörmət ruhunda tərbiyə etməkdir. Eyni zamanda, fiziki cəhətdən sağlam gənc nəsil yetişdirmək və ekoloji təmizliyə şərait yaradan velosiped idman növünü gənclər arasında geniş təbliğ etməkdir. Qafar Əliyev əlavə edib ki, yarışın qalibləri Qaradağ rayon İcra Hakimiyyətinin, YAP Qaradağ rayon təşkilatının və Respublika Olimpiya Velosiped Məktəbinin diplomları və qiymətli hədiyyələrlə mükafatlandırılacaqlar.
Yarış iştirakçılarını salamlayan Qaradağ rayon İcra Hakimiyyətinin şöbə müdiri, məşhur “91-lərin” nümayəndəsii Munis Bayramov Ulu Öndər Heydər Əliyevin milli dövlətçiliyimizin bərpası və inkişafında göstərdiyi xidmətlərdən bəhs edib, gənc idmançılara uğurlar arzulayıb.
Respublika Olimpiya Velosiped Məktəbinin direktor müavini Gülnarə Malikova yarışın təşkilinə görə YAP Qaradağ rayon təşkilatına və Qaradağ rayon İcra Hakimiyyətinə minnətdarlığını bildirib. Belə yarışların həm sağlam gəncliyimizin böyüməsinə, həm də ekoloji təmizliyə mühüm töhfələr verdiyini bildirən direktor müavini yarışın Əsasnaməsi və keçirilmə qaydaları barədə məlumat verib.
Sonra Lökbatan qəsəbəsinin Nəriman Nərimanov küçəsi boyunca keçirilən və rayonda fəaliyyət göstərən 26 məktəbin və bir peşə məktəbinin komandasının qatıldığı yarışa start verilib.
Gərgin keçən idman mübarizəsinin qaliblərinə mükafatlar Heydər Əliyev Mərkəzində təqdim edilib. Mükafatlandırma mərasimini açıq elan edən YAP Qaradağ rayon təşkilatının sədri Qfar Əliyev bütün iştirakçılara təşəkkürünü çatdırıb.
Sonra yarışda I yeri tutan E.Həsənov adına 139 nömrəli məktəbin komandasına qızıl, II yeri tutan 14 nömrəli Bakı Peşə Məktəbinin komandasına gümüş və III yeri tutan 166 nömrəli məktəb-liseyin komandasına bürünc medallar və diplomlar təqdim edilib.
Yarışın təşkilinə göstərilən dəstəyə görə hakimlər komandasına da diplomlar verilib.
Zamin Məmmədov, "İki sahil"
